Marlunngorneq 3. August 2010 Ilulissani PI/SPS’imi ammarneqassaaq Inunnik Isumaginninnermut Sammisumik Perorsaanermi Ilisimasaqarfik nutaaq Ilisimasaqarfiup suliassai Inunnik isumaginninnermut sammisumik perorsaanermi Ilisimasaqarfiup suliassaraa katersussallugit, pilersissallugit aamma siammartissallugit inunnik isumaginninnermut sammisumik perorsaanermi eqqarsaatersuutit aamma periaatsit, matuma ataani periaatsit inunnik isumaginninnermik aamma inunnik isumaginninnermut sammisumik perorsaanermi ajornartorsiutinik pinaveersaartitsisinnaasut aamma unammilligassat. Immikkut qitiutinneqassaaq suliat akimorlugit suleqatigiinnissaq aamma aaqqissuussamik sammisanullu attuumassutilimmik isiginninneq perorsaanermik suliaqarnermi pinaveersaartitsinermilu. Ilisimasaqarfiup suliaani suliamut attuumassutillit makkua erseqqissumik pingaartinneqassapput. 1. Suliassaqarfiit meeqqanut inuusuttunullu tunngasut 2. Innarluutillit aamma inuiaqatigiinni avinngarusimasutut inissisimasut 3. Inunnik isumaginninnermut sammisumik perorsaanermik nalunaarsuineq aamma periaatsinik ineriartortitsineq Ilisimasaqarfiup sanarfissavai ilisimasat aamma periaatsit pinaveersaartitsinermut aamma passussinermut tunngasut Kalaallit Nunaanni pissutsit tungaanniit isigalugu. Tamanna isumaqarpoq sammineqassasut inunnik isumaginnnermut sammisumik perorsaanermi ajornartorsiutitut inissisimasut suleriaatsini saqqumisut, tassa imaappoq Ilisimasaqarfiup suliaa tassaavoq ineriartortitsineq aamma misissueqqissaarneq perorsaanermi suleriaatsinik. Eqqarsaatersuutit perorsaanermut, tarnip pissusiinut aamma inooqatigiinnermut tunngasut namminneq anguniagaanngillat, kisianni pisariaqartinneqarput ajornartorsiutitut inissisimasut ataqatigiissuunerata paasisinnaaneranut misissoqqissaarnissaanullu kalaallini inuiaqatigiinni pisariaqartinneqartumik aaqqiissutaasinnaasut. Anguniagaq tassaanngilaq ilinniagassat aalajangersimasut atuagarsornertaanik aamma periaatsinik ilikkagaqarnissaq ilisimasalli sanarfinissaat perorsaanermi suleriaatsini sunniuteqartussat. Ulloq 3. august nal. 13.00 pisortatigoortumik ammaasuussaaq rektor Nuka Kleemann.
