Ilinniartut najugaqarfii
Perorsaanermik ilinniarfik PI/SPS Ilulissat
Ilinniartut ineqarfianut tikilluarit
Ilulissanut ilinniartullu ineqarfiannut Ilulissaniittumut tikilluarit.
Sapaatip akunnerini 20-ni imaluunniit ukiut sisamassaat avillugu maaniissagaluaruit Ilulissani ilinniagaqartillutit ilinniartut ineqarfiat inuuninnut annertuumik pingaaruteqassaaq.
Siullermeerlutit angerlarsimaffiit qimassimagukku sorpassuit isumaginissaat paasiniassavat immaqalu aamma siullermernit annertunerusumik imminut akisussaaffigilissallutit. Ilinniartut ineqarfii sulisoqarput ineriartornermi tassani ikiuussinnaasunik tapersersuisinnaasunillu aammalu tamaat ataatsimut isigalugu avatangiisit inuuffigiuminartut pilersinnissaannut suleqataasinnaasunik.
Ilinniartut ineqarfianni inuit amerlasuut najugaqatigissavatit. Pisariaqarpoq ammasuunissat, qanilaartuunissat aamma akaarinnittuunissat; tamannali annertuumik pissarsiaqarnartuuvoq. Suleqatigiillusi sulisullu peqatigalugit ilinniartut ineqarfiat tassaalersissinnaavarsi ilinniarneq pillugu najortariaqakkamit allaanerusoq.
Neriuppugut tamassi ilinniartut ineqarfianni pitsaasumik avatangiiseqarnissaq peqataaffigiumaarissi.
Ilinniartut ineqarfii Ilulissaniittut
Ilinniartut ineqarfiat ilinnut ilinniarneq pissutigalugu Ilulissanut nuuttussamut neqeroorutaavoq. Ilinniartut ineqarfii Ilulissaniittut arlaqarput. Ukioq ataasikkaarlugu ineeqqamik/inissiamik tunineqartassaatit. Ilinniartut ineqarfiini sorlerni najugaqarniarluni nammineq toqqaanissamut periarfissaqanngilaq.
Perorsaanermik Ilinniarfimmi Ilinniartut ineqarfiisa ilaanni inissiat amerlanngitsut qitornalinnut naatsorsuussaapput. Kisimiittuuguit inimik pequtsersukkamik mikinerusumik inissaqartinneqassaatit. igaffik, ini, isersimaartarfik, uffarfillu ineqartullu allat sisamaallusi arfineq pingasuullusiluunniit ataatsimoorutissuarsi. Inimi isersimaartarfimmi isiginnaaruteqarpoq aamma ineqartunit errorsissutit atorneqarsinnaapput.
Ukiut sisamassaat avillugu ilinniarnerminnik aallartittussat Koororsuarmi kollegiani inissiamik tunineqartarput. Ukiuni pingasuni affarmilu ilinniartut meeqqisartut inissiani inissinneqartarput. Meeqqisaanngitsullu kollegiani inissinneqartarlutik.
Inunnik isumaginninnermi ikiortinngorniat branchertut ilaqutaat/meeraat Perorsaanermik Ilinniarfimmiit inissaqartinneqanngillat.
Opgangikkaarlugit ineqartut ataatsimiitinneqartassapput ineqartullu tamarmik ataatsimiinnerni taakkunani peqataasassapput. Inissianittaaq najugallit ataatsimiitinneqartarput.
Malittarisassat
Ilinniartut ineqarfianni najugaqaruit pisussaaffigaat maleruagassat inissianut atuuttut malissallugit, taamaanngippat anisitaasinnaagavit. Taamatut pisoqartillugu ilinniartut ineqarfianni allami inimik innersuussisoqassanngilaq.
Ineqarfinni ilinniagaqartunut ataatsimut malittarisassat
Ataani allassimasut unioqqutinneqarpata ingerlaannartumik anisitaasoqassaaq:
- Ineqartunut allanut imaluunniit sulisunut qunusaarineq annersaanerlunniit.
- Ikiaroornartumik tigummiarneq, atuineq tuniniaanerlu (nakorsaatit uani pineqanngillat).
- Tillinniarneq aamma ingasattumik aserorterineq.
Ataani allassimasut unioqqutinneqarpata mianersoqqussummik nassataqassapput taamaalioqqikkaannilu anisitaanermik:
- Aserorterineq (taarsiisussaatitaaneq)
- Imigassartorneq, ineqartunut allanut sulisunullu akornutaappat
- Aallaammik inigisamiiititaqarneq/kollegiamiititaqarneq
- Uumasuuterqarneq, soorlu qimmit, qitsuit allallu
- Illuni malittarisassanik suusupaginninneq (eqqiaaneq, ataatsimiinnerit allallu)
Maleruagassat nalinginnaasut makku taaneqarsinnaapput:
- Nipiliorneq nipituumillu nipilersorneq ineqartunut allanut akornutaassanngilaq ininilu nipiliortuerutereersimassaaq nal. 23:00.
- Pulaartut ineqartunut akornusersuissanngilluinnarput.
- Ineqartoq pisinnaatitaavoq tikeraartoqarnissaminut sivisunerpaamik ulluni 14-ini atuarfimmiinneq ataaseq.
- Ineqarfinni atuarfimmilu pujortarneq inerteqqutaapput.
Maleruagassanik unioqqutitsinermi immikkut malitseqartitsisoqarnissaanik allassimasoqanngippat makku malinneqassapput:
- Siullermeernermi: Oqaatsitigut mianersoqqussut
- Aappassaaneernermi: Allakkatigut mianersoqqussut
- Pingajussaaneernermi: Anisitaaneq
Inunnik isumaginninnermi ikiortinngornianut branchertunut makkua atuupput: Kollegianiit anisitaanerup aamma nassatarissavaa atuarnermiit anisitaaneq. Perorsaasunngorniamut kollegianiit anisitaaneq atuuppoq.
Eqqiaaneq
Ilinniartut inaanni ineqartut nammineerlutik eqqiaaneq isumagissavaat namminneq iniminni aamma ataatsimoorussani soorlu isersimaartarfinni, iggavinni aamma uffarfinni. Eqqiaanissamut pilersaarusiaq najugaqartunit malinneqassaaq. Eqqiaanermut atortussaqarpoq aamma støvsugeqarpoq. Eqqiaanissamut pilersaarusiaq malinneqanngikkaangat ilinniartut inaanni anisitaasinnaavutit.
Atisanik errorsineq
PI/SPS’imi ilinniartut errorsivinnik atugassaqarput. Illit nammineq errorsinermut qaqorsaatit isumagissavatit.
Nerisaqarneq
Ilinniartut inaanni najugaqaruit nammineerlutit nerisassatit isumagissavatit.
Eqqaamajuk igaffik qimatsinnagu torersaassagavit.Perorsaanermik Ilinniarfimmi nerisarfeqarpoq ilinniartuugaanni neriffigineqarsinnaasumik. Nerinermut billetit Perorsaanermik Ilinniarfimmi pisiarineqarsinnaapput. Nerinissamut kortimik pisinermi akikilliliivigineqarnissamut periarfissaqarpoq.
Sulisut
Ilinniartut ineqarfiini amerlanerni sulisoqarpoq sapinngisamik najoruminarsaaqataasussanik. Ajornartorsiuteqaruit imaluunniit oqaloqateqarusukkuit tamatigut sulisunut saaffiginnissinnaavutit.
Kollegiami ineeraq
Ineeraq atorfissaqartitannik tamanik pequteqarpoq. Illit nammineerlutit oqorutit allarutillu nassassavatit. Eqqaamajuk oqorutit angalanerni tigummiaannagassatut nassassagakkit, tassa PI/SPS ilinniartunut oqorutinik atukkiussineq ajormat.
Kollegiami inissiaq
Inissiat atorfissaqartitarnik tamanik pequsersugaapput, taamaattoq fjernsyn aamma radio pinnagit (takukkit inissiat pequtaat) Illit nammineerlutit qipik, akiseq oqorutillu qalii aamma allarutit nassassavatit. Tamakku angalanermi tigummiaannagassatut nassarneqassapput, tassa PI/SPS oqorutinik atukkiussineq ajormat.
Innersuunneqassooq TV, radio qerititsivimmillu nassartoqassasoq.
Inissiani najugaqartussat attartornermut isumaqatigiissut atsiussavaat.
Inigisami aserorterineq paarsinerlunnerlu (nalinginnaasumik nungullariartorneq pinnagu) taarsiisussanngortitaanermik kinguneqassaaq. Inigisat kisivit inigisinnaavat, tamannalu eqquutsinngikkukku inigisanniit anisitaasinnaavutit.
Ineqarnermut akiliut
Ineeqqami ineqarnermut akiliut qaammammut kr. 850,00. Inissiami ineqarnermut akiliut qaammammut kr. 1.700,00.
Ilinniagaqarnersiutisisaruit ineqarnermut akiliutissatit ilinniagaqarnersiutit tunniunneqalersinnagit ilanngaatigineqartassapput.
Sillimmasiineq
Tillinniarfigineqarsimaguit imaluunniit ikuallattoqarneratigut ajoqutissarsisimaguit nammineq pigisatit ilinniartut ineqarfiannit sillimmasersimanngillat. Taamaattumik misissoruk ilinniarnerpit nalaani angajoqqaavit sillimmasiissutaannut atanersutit imaluunniit nammineerlutit sillimmasiigit.
Ilulissanut tikinneq
Ilinniartut ineqarfiannit allagarsiguit ilinniartut ineqarfianni sorlermi ineqassanersutit, taava Ilinniartut ineqarfiinut allaffik attaveqarfigiuk ulloq suna Ilulissanut tikissanersutit aamma umiarsuaq imaluunniit timmisartup normua miffimmit kingullermit sorleq ilaaffiginerit nalunaarutigalugit. Taava ilinniartut ineqarfiata isumannaassavaa ilinniartut ineqarfiannut tikikkuit saaffissaqarnissat. Piffissaq tikiffissat aallarnerup siornatigut kingornatigulluunniit imaluunniit timmisartup normua allannguuteqassappat taava tamakku ilinniartut ineqarfiannut nalunaarutigikkit. Sillimaffigiuk tikinnerni aaneqarumaaravit aamma aallalernerni aallariartuunneqarumaaravit.
(Feriartoqarnerani pedelip angallassineq isumagineq ajorpaa).
Aallarneq
Ilinniartut ineqarfianni inigisaq sungiusarluni sulinermi qimanneqartassaaq aamma ilinniarnerup naammassinerata kinguninngua imaluunniit ilinniarnerup taamaatiinnarnerani.
Kollegiani inissiami pisattat allattorsimaffiat
Nillataartitsivik qerititsiveerartalik. Nerrivik nerisarfik allisartoq 150 x 80 cm * issiaviillu sisamat. Ilisivik 75 x 75 cm siniffik amusartoqanngitsoq issiavissuaq ataaseq * Nerriveeraq 50 x 50 Qulleq * Qilaamilu qulleq * siniffik ataasiittariaq marluk x 120 siniffiullu tunuliaqutaa * Ilisiveeqqat marluk siniffiup siniffiup qulaatungaani. * Qilaani qulleq ataaseq * Allaffissorluni issiavik * Iikkami qulliit marluk luxo. Siniffiit qaleriissiat. Meeraaqqap siniffia, meeraaqqallu issiavia attartorneqarsinnaapput.
Ukua atortut pigineqarput Erruilluni ilioraavik, qasilittuusiviit tarattuusiviit, immussuarnut agguut, qillertuusanut ammaat, erruivik, si, kaffimut nakkartitsivik, 5 literimut siparni, savik, siatsivik, aalaterut, niutsit, alussaat nakkartitsivik,
saniutit-sanerfik, råkostinut agguut, mumigut, naatsiianut savik, erruilluni børsti, neqinut savik, ermusiusaq uuttuut, skål-eq, agguivik qisuk plastikkerlu, ingaq matulik 2,1 literi, The-kandi-imermut qalatsitsivik, ingaq matulik 4 literi, ingaq matulik 6 literi, kandi, arsakoorfik, ingaq matulik 2 literi, siatsinermi puugutarsuaq, uutsinermi puugutarsuaq, miseraasivik, miseqqamut alussaatit marluk qisuit, ukualu pingasukkaarlugit-ingamut allequtat-salatskålet-taniissutit, ukualu 8-kkaarlungit-tiitorfiit-kaagit allequtai 17 cm-puugutaasat itisuut-puugutaasat-saviit-ajassaatit-alussaateeqqat-alussaatillu.
Koororsuaq Kollegiet
Inissiaq
Ineeraq
Marralinnguaq Kollegiet
Marralinnguaq ineeraq
