Ilulissanut tikilluarit aammalu Ilulissani ilinniartut inaataannut tikilluarit.

Sapaatip akunnerini 20-ni imaluunniit ukiut sisamassaat avillugu maaniissagaluaruit Ilulissani ilinniagaqartillutit ilinniartut ineqarfiat inuuninnut annertuumik pingaaruteqassaaq. Siullermeerlutit angerlarsimaffiit qimassimagukku sorpassuit isumaginissaat paasiniassavat immaqalu aamma siullermernit annertunerusumik imminut akisussaaffigilissallutit. Ilinniartut ineqarfii sulisoqarput ineriartornermi tassani ikiuussinnaasunik tapersersuisinnaasunillu aammalu tamaat ataatsimut isigalugu avatangiisit inuuffigiuminartut pilersinnissaannut suleqataasinnaasunik.

Ilinniartut ineqarfianni inuit amerlasuut najugaqatigissavatit. Pisariaqarpoq ammasuunissat, qanilaartuunissat aamma akaarinnittuunissat; tamannali annertuumik pissarsiaqarnartuuvoq.  Suleqatigiillusi sulisullu peqatigalugit ilinniartut ineqarfiat tassaalersissinnaavarsi ilinniarneq pillugu najortariaqakkamit allaanerusoq. Neriuppugut tamassi ilinniartut ineqarfianni pitsaasumik avatangiiseqarnissaq peqataaffigiumaarissi.

Ilinniartut ineqarfii Ilulissaniittut

Ilinniartut ineqarfiat ilinnut ilinniarneq pissutigalugu Ilulissanut nuuttussamut neqeroorutaavoq. Ilinniartut ineqarfii Ilulissaniittut arlaqarput. Ukioq ataasikkaarlugu ineeqqamik/inissiamik tunineqartassaatit.  Ilinniartut ineqarfiini sorlerni najugaqarniarluni nammineq toqqaanissamut periarfissaqanngilaq. Perorsaanermik Ilinniarfimmi  Ilinniartut ineqarfiini inissiaqarpoq marlunnik inilinnik, aappariinnut ineeraq anginerulaaq, taavalu kisimiittunut.

Ukiut sisamassaat avillugu ilinniarnerminnik aallartittussat Qoororsuarmi ilinniartut ineqarfiini inissiamik tunineqartarput. Ukiuni pingasuni affarmilu ilinniartut meeqqisartut inissiani inissinneqartarput. Meeqqisaanngitsullu ineeqqanut inissinneqartarlutik.  Isumaginninnermi ikiortinngorniat branchertut ilaqutaat/meeraat Perorsaanermik Ilinniarfimmiit inissaqartinneqanngillat.

Opgangikkaarlugit ineqartut ataatsimiitinneqartassapput ineqartullu tamarmik ataatsimiinnerni taakkunani peqataasassapput. Inissianittaaq najugallit ataatsimiitinneqartarput.

Maleruagassat Ilinniartut ineqarfianni najugaqaruit pisussaaffigaat maleruagassat inissianut atuuttut malissallugit, taamaanngippat anisitaanermik kinguneqarsinnaavoq. Taamatut pisoqartillugu ilinniartut ineqarfianni allami inimik innersuussisoqarneq ajorpoq.