Ilinnialernissamut qinnuteqarnissaq Piareersarfinnut saaffiginninnikkut pissaaq, taamaammat illoqarfigisavit Piareersarfianut innersuutissavatsigit.

Perorsaanermik Ilinniarfimmi ilinniartinneqartarput Isumaginninnermi ikiortinngorniat, socialassistent’inngorniat aammalu Perorsaanermik sammivilimmik bacheloritut ilinniartut.

Sulissutigaarput unammilligassat aaqqiiviginiarneri sukumiisumik pitsaasumillu suleqatigiinneq aqqutigalugit aammalu sallersaatipparput ammasumik akuersaartumillu peqataalernartumik oqaloqatigiinneq tatiginninneq ataqatigiinnerlu pilersinniarlugit.

Perorsaasunngorniat ilinniartilerpagut 70-ikkut qiteqqunneranni, taamanikkulli ilinniarneq, piginnaasat aamma illutai ineriartortissimavagut. Ilinniarneq 1995'imi Ilulissanut nuunneqarpoq taamanikkumiilli maani angerlarsimaffeqarluni aammalu 2011 jannuaari qaammat illumut nutaamut kusanartumut nutserpugut.